சென்னை ரயில் பயணிகளுக்கு அதிர்ச்சி: இன்றிரவு பல மின்சார ரயில்கள் ரத்து! மாற்று வழி இதோ

சென்னை எழும்பூர் ரயில் நிலையத்தில் பராமரிப்புப் பணிகள் நடைபெறுவதால், இன்று (ஆகஸ்ட் 30) ஞாயிற்றுக்கிழமை இரவில் புறநகர் ரயில் சேவைகளில் மாற்றம் செய்யப்பட்டுள்ளது. தெற்கு ரயில்வே மேற்கொள்ளும் இந்த பராமரிப்புப் பணி காரணமாக, இரவு 10:00 மணி முதல் 11:59 மணி வரை பல மின்சார ரயில்கள் ரத்து செய்யப்பட்டுள்ளன. இதனால் இரவு நேரப் பயணிகள், விமான நிலையம் செல்வோர் மற்றும் ஷிப்ட் முடிந்து வீடு திரும்புவோர் சிரமத்தைத் தவிர்க்க முன்கூட்டியே திட்டமிடுவது நல்லது. இன்றிரவு ரத்து செய்யப்பட்டுள்ள ரயில்கள் மற்றும் அதற்கு மாற்றாகப் பயன்படுத்தக்கூடிய பிற போக்குவரத்து வசதிகள் பற்றிய முழு விவரங்கள் இதோ.

இன்றிரவு ரத்து செய்யப்படும் ரயில்கள்: சென்னை பீச் - தாம்பரம் இடையே இரவு 10:00, 11:20, 11:40 மற்றும் 11:59 மணிக்கு புறப்பட வேண்டிய ரயில்கள் ரத்து செய்யப்பட்டுள்ளன. அதேபோல தாம்பரம் - பீச் இடையே இரவு 11:00 மற்றும் 11:40 மணி ரயில்களும், திருமால்பூர் - பீச் இடையே இரவு 8:00 மணி ரயிலும் இயங்காது. இரவு 11:15 மணி முதல் அதிகாலை 4:15 மணி வரை 5 மணி நேர மின்சார மற்றும் பாதை பராமரிப்புப் பணிகள் நடைபெறவுள்ளதால், இந்த வழித்தடத்தில் பயணிப்போர் இரவு 9:30 மணிக்கு முன்பாகவே ரயில்களில் ஏறிவிடுவது பாதுகாப்பானது.

சென்னை மின்சார ரயில் சேவை ரத்து: கடைசி ரயில்கள் மற்றும் மாற்று வழிகள்

முந்தைய ரயில்களைத் தவறவிட்டால், இந்த இரண்டு நேர மாற்றங்களை நினைவில் கொள்ளுங்கள்: பீச் - கூடுவாஞ்சேரி ரயில் இரவு 9:50 மணிக்கும், பீச் - செங்கல்பட்டு ரயில் இரவு 10:15 மணிக்கும் புறப்படும். சென்னை பீச் நோக்கி வரும் சில ரயில்கள் தாம்பரத்தோடு நிறுத்தப்படும். இரவு 10:00 மணிக்கு பிறகான ரயில் பயணங்களுக்கு NTES செயலி அல்லது 139 எண்ணில் நேரலை நிலவரத்தைச் சரிபார்ப்பது அவசியம். மேலும் நடைமேடை மாற்றங்களுக்கும் தயாராக இருங்கள். ஆலந்தூர் வழித்தடத்தின் மூலம் விமான நிலையம் செல்வோருக்குக் கூடுதல் நேரம் தேவைப்படலாம்.

சென்னை எக்ஸ்பிரஸ் ரயில்கள் புறப்படும் இடம் மாற்றம்: தாம்பரம், மாம்பலம், பீச் விவரம்

எழும்பூர் ரயில் நிலையத்தில் நடைமேடை மேம்பாலப் பணிகள் நடைபெறுவதால், ஆகஸ்ட் 30 வரை எக்ஸ்பிரஸ் ரயில்கள் புறப்படும் இடத்திலும் மாற்றங்கள் தொடர்கின்றன. உழவன், அனந்தபுரி, மங்களூரு சென்ட்ரல், மலைக்கோட்டை (ராக்ஃபோர்ட்) உள்ளிட்ட 9 எக்ஸ்பிரஸ் ரயில்கள் குறிப்பிட்ட நாட்களில் எழும்பூருக்குப் பதிலாக தாம்பரம் அல்லது மாம்பலத்திலிருந்து புறப்படவோ அல்லது அங்கே தனது சேவையை முடிக்கவோ அறிவுறுத்தப்பட்டுள்ளன. வீட்டிலிருந்து புறப்படும் முன் இன்றிரவு உங்களது ரயில் எங்கிருந்து புறப்படுகிறது என்பதை NTES அல்லது 139 மூலம் உறுதிசெய்து கொள்ளுங்கள். தாம்பரத்திலிருந்து புறப்படும் ரயில்களுக்குச் செல்ல மெட்ரோ அல்லது மாநகரப் பேருந்துகளை முன்கூட்டியே பயன்படுத்துங்கள்.

இன்றிரவுக்கான சென்னை மெட்ரோ மற்றும் எம்.டி.சி பேருந்து வசதிகள்

இரவு 11 மணிக்கு முன் பயணிப்பவர்களுக்கு மெட்ரோ ரயில் மிகச் சிறந்த மாற்றாகும். ஞாயிற்றுக்கிழமைகளில் சென்ட்ரல் - ஏர்போர்ட் கடைசி மெட்ரோ ரயில் இரவு 11:17 மணிக்கும், ஏர்போர்ட் - சென்ட்ரல் கடைசி ரயில் இரவு 11:08 மணிக்கும் புறப்படும். புளூ லைனில் சென்ட்ரலிலிருந்து கடைசி ரயில் இரவு 11:07 மணிக்கு இயங்கும். சென்ட்ரல், எழும்பூர், கிண்டி, ஆலந்தூர் அல்லது ஏர்போர்ட் ஆகிய இணைப்பு நிலையங்களைப் பயன்படுத்திக் கொள்ளலாம். இரவு 11 மணிக்கு மேல், MTCயின் 47F, 5A மற்றும் 170TX ஆகிய பேருந்துகள் இயங்கும். பேருந்து நேரலை நிலவரத்தையும் சரிபார்த்துக் கொள்வது நல்லது.

ரயில் ரத்து செய்யப்பட்டால், இ-டிக்கெட் எடுத்தவர்களுக்குக் கட்டணம் தானாகவே கணக்கில் ரீஃப்ரண்ட் ஆகிவிடும். பாதியில் நிறுத்தப்படும் ரயில்கள் அல்லது பகுதி ரத்து செய்யப்பட்ட ரயில்களுக்கு, 72 மணி நேரத்திற்குள் 'டிக்கெட் டெபாசிட் ரெசிப்ட்' (TDR) தாக்கல் செய்ய வேண்டும். கவுண்டர் டிக்கெட் வைத்திருப்பவர்கள் ரயில்வே கவுண்டரிலேயே குறிப்பிட்ட நேரத்திற்குள் பணத்தைப் பெற்றுக் கொள்ளலாம். ரயில்களின் நேரலை விவரங்களுக்கும் உதவிக்கும் NTES செயலி மற்றும் 139 ரயில் மதத் உதவி எண்ணைப் பயன்படுத்தலாம். ரத்து செய்யப்பட்ட தகவலின் ஸ்கிரீன்ஷாட் வைத்திருந்தால் ரீஃப்ரண்ட் தொகையை விரைவாகப் பெற உதவிகரமாக இருக்கும்.