கவுண்டரில் புக் செய்யும் டிக்கெட்டுகளை விட ஆன்லைன் டிக்கெட்டுகள் ஏன் விலை அதிகம் – இதோ காரணங்கள்!

அவசர காரணங்களுக்காக ரயில் டிக்கெட் புக் செய்யும் போது தான், கடைசி நேரத்தில் அதிக விலை விற்பதை நாம் உணர்கிறோம். நீங்கள் என்ன தான் யுக்திகள் உபயோகித்தாலும் கூட, கவுண்டரில் வாங்கும் டிக்கெட்டுகளை விட ஆன்லைனில் புக் செய்யும் டிக்கெட்டுகளின் விலை அதிகமாக தான் விற்கப்படுகிறது. IRCTC மூலம் ஆன்லைனில் டிக்கெட் முன்பதிவு செய்யும் பயணிகள், ரயில் கவுண்டர்களில் நேரடியாக வாங்குபவர்களை விட அதிகமாக பணம் செலுத்துவதற்கு சில காரணங்கள் உள்ளன என மத்திய அரசு தெரிவித்துள்ளது. அவை என்னென்ன தெரியுமா?

ஆன்லைன் முன்பதிவு தான் விருப்பமான தேர்வு

இந்திய ரயில்வே உலகின் மிகப்பெரிய ரயில்வே நெட்வொர்க்குகளில் ஒன்றாகும். தினமும் 23 மில்லியனுக்கும் அதிகமான பயணிகள் பயணம் செய்யும் இந்திய ரயில்வே, தேசத்திற்கு ஒரு உயிர்நாடியாக உள்ளது. பண்டிகைகள் மற்றும் திருமண காலங்களில், ரயில் பயணிகளின் எண்ணிக்கை இன்னும் அதிகமாகிறது. முன்பதிவு செய்யப்பட்ட இருக்கையைப் பெற பயணிகள் டிக்கெட் கவுன்டர்களில் நீண்ட வரிசையில் நிற்க வேண்டிய ஒரு காலம் இருந்தது. ஆனால் இந்தியாவின் விரைவான டிஜிட்டல் மாற்றத்துடன், ஆன்லைன் டிக்கெட் முன்பதிவு விருப்பமான தேர்வாக மாறியுள்ளது.

ஆன்லைன் டிக்கேட்டுகளை விட கவுண்டர் டிக்கெட்டுகள் விலை குறைவு

டிக்கெட் கவுன்டர்களில் இருந்து வாங்குபவர்களை விட ஆன்லைனில் டிக்கெட் முன்பதிவு செய்பவர்களின் எண்ணிக்கை பல மடங்கு அதிகமாக உள்ளது. இருப்பினும், பயணிகளிடையே உள்ள ஒரு பொதுவான கவலை என்னவென்றால், ஆன்லைன் டிக்கெட்டுகள் கவுன்டர் டிக்கெட்டுகளை விட அதிகமாக செலவாகும். நீங்கள் எப்போதாவது ஒரு ரயில் டிக்கெட்டை ஆன்லைனில் முன்பதிவு செய்திருந்தால், அது கவுன்டர் டிக்கெட்டை விட விலை அதிகம் என்பதை நீங்கள் கவனித்திருக்க வேண்டும்.

ஆன்லைன் டிக்கெட் விலை குறித்து கேள்வி

ஆன்லைன் டிக்கெட்டுகள் கவுண்டர் டிக்கெட்டுகளை விட ஏன் அதிக விலை கொண்டவை என்று சிவசேனா தலைவர் சஞ்சய் ராவத் சமீபத்தில் ராஜ்யசபாவில் இந்தப் பிரச்சினையை எழுப்பி, ஆன்லைன் டிக்கெட்டுகள் கவுண்டர் டிக்கெட்டுகளை விட ஏன் அதிகம் என்று கேள்வி எழுப்பினார். இதற்கு பதிலளித்த மத்திய ரயில்வே அமைச்சர் அஸ்வினி வைஷ்ணவ், ஆன்லைன் டிக்கெட் முறையைப் பராமரித்தல், மேம்படுத்துதல் மற்றும் விரிவுபடுத்துதல் ஆகியவற்றுக்கு ஐஆர்சிடிசி கணிசமான செலவுகளைச் செய்கிறது என்று விளக்கினார். இந்தச் செலவுகளை மீட்டெடுக்க, ஐஆர்சிடிசி ஆன்லைன் டிக்கெட் முன்பதிவுகளுக்கு வசதிக் கட்டணத்தை வசூலிக்கிறது என்று அவர் மேலும் கூறினார்.

ஏன் ஆன்லைன் டிக்கேட்டுகள் விலை அதிகம்

இன்று, இந்தியாவில் உள்ள அனைத்து ரயில் டிக்கெட்டுகளிலும் 80% ஐஆர்சிடிசி வழியாக ஆன்லைனில் முன்பதிவு செய்யப்படுகின்றன. சுலபமாக இருக்கின்ற இடத்தில் இருந்தே டிக்கெட் முன்பதிவு செய்ய ஏதுவாக இருப்பதனால் அனைத்து மக்களும் இப்போதெல்லாம் ஆன்லைனில் டிக்கெட் முன்பதிவு செய்வதையே விரும்புகின்றனர். ஆனால் அவை விலை ஏன் அதிகமாக இருக்கின்றன என்பதற்கு சில காரணங்கள் உண்டு;

1. ஆன்லைன் ரயில் டிக்கெட்டுகளை IRCTC (இந்திய ரயில்வே கேட்டரிங் மற்றும் சுற்றுலா கழகம்) மூலம் மட்டுமே முன்பதிவு செய்ய முடியும்.

2. டிக்கெட் முன்பதிவு செய்ய நீங்கள் மூன்றாம் தரப்பு பயன்பாட்டைப் பயன்படுத்தினாலும், உங்களுக்கு இன்னும் IRCTC கணக்கு தேவை. அது இல்லாமல், ஆன்லைன் முன்பதிவு சாத்தியமில்லை.

3. ஆன்லைனில் டிக்கெட் முன்பதிவு செய்யும் போது, ஐஆர்சிடிசி பயணிகளிடம் சரக்கு மற்றும் சேவை வரி (ஜிஎஸ்டி) உடன் ஒரு வசதிக் கட்டணத்தையும் வசூலிக்கிறது.

4. வசதிக் கட்டணம் நேரடியாக ஐஆர்சிடிசிக்குச் செல்கிறது, அதே நேரத்தில் ஜிஎஸ்டி அரசாங்கத்தால் வசூலிக்கப்படுகிறது.

5. இந்தக் கூடுதல் கட்டணங்கள் ஆன்லைன் டிக்கெட்டுகளை கவுண்டர் டிக்கெட்டுகளை விட அதிகமாக ஆக்குகின்றன.