திருச்சிக்கு பக்கத்தில இப்படியொரு அழகான இடமா – ஜில்லுன்னு அருவி, ட்ரெக்கிங், ஓய்வு எல்லாம் ஒரே இடத்தில!

அடிக்கிற வெயிலுக்கு இதமா அருவியில ஜில்லுன்னு ஒரு குளியல் போட்டா சூப்பரா இருக்கும் இல்லயா! திருச்சிக்கு பக்கத்தில ஒரு மணி நேர பயண தூரத்தில எங்கு பார்த்தாலும் பசுமை, ஆர்பரித்து கொட்டுகிற வெள்ளம், கூழாங்கல் பாதை என ரம்மியமாக இருக்கிற ஒரு அழகான ஸ்பாட்டான புளியஞ்சோலை பற்றி நீங்கள் கேளவிபட்டு இருக்கிறீர்களா? பரபரப்பான நகர வாழ்க்கையில் இருந்து ஓய்வு எடுத்து ஒரு நாள் முழுக்க ஆட்டம் போட இது ஒரு அருமையான இடம். இந்த அழகான இடத்திற்கு எப்போது செல்லலாம்? எப்படி செல்லலாம்? என்று பார்ப்போமா!

திருச்சியிலிருந்து 1 மணி நேர பயண தூரத்தில் அமைந்துள்ள அழகிய இடம்

திருச்சியின் சலசலப்பில் இருந்து 72 கிமீ தொலைவில் உள்ள புளியஞ்சோலை ஒரு அமைதியான அழகான இடமாகும். கொல்லிமலை அடிவாரத்தில் உள்ள அடர்ந்த வனப்பகுதி புளியஞ்சோலை பசுமையான காடுகளால் சூழப்பட்ட இயற்கை நீரூற்றுகள், ஆறுகள் மற்றும் எல்லாவற்றிற்கும் மேலாக, அமைதியின் உச்ச உணர்வைத் தரும் அழகிய இடமாக நம்மை வரவேற்கிறது. காடுகளில் இயற்கை நீரூற்றுகளை விரும்புவோருக்கு, புளியஞ்சோலை சரியான தேர்வு. கொல்லி மலையின் அடிவாரத்தில் அமைந்துள்ள இந்த இடம் சுற்றுலாப் பயணிகளுக்கு எல்லா நேரத்திலும் மிகவும் பிடித்தமானதாக அமைகிறது.

இயற்கை அழகால் நம்மை கட்டிப்போடும் புளியஞ்சோலை

புளியமரங்களின் அமைதியும் ஆகாய கங்கை நீர்வீழ்ச்சிகளும் ஆண்டு முழுவதும் நாடு முழுவதிலும் இருந்து இயற்கை ஆர்வலர்களை கவர்ந்திழுக்கிறது. உள்ளூரில் உள்ள இயற்கை எழில் கொஞ்சும் இடங்கள் தவிர, கிராமமே வசீகரத்துடன் மிளிர்கிறது. தடுப்பு அணைகளால் உருவாக்கப்பட்ட தற்காலிக ஏரியில் குழந்தைகளும் குளிப்பதைப் பார்க்கும்போது நீங்கள் புன்னகைக்காமல் இருக்க முடியாது. சுற்றுலாப் பயணிகள் ஓய்வு நேரத்தில் நீந்தக்கூடிய பல நீரோடைகள் உள்ளன. இந்த நீரோடைகளில் உள்ள நீர் மிகையான மூலிகை செடிகள் வழியாக பாய்வதால் பெரும் மருத்துவ குணம் உள்ளதாக இங்குள்ள மக்கள் நம்புகின்றனர்.

கோடை வெப்பத்திலிருந்து தப்பிக்க ஒரு சூப்பரான ஸ்பாட்

புளியஞ்சோலை நீர்வீழ்ச்சி ஒரு மொட்டை மாடி நீர்வீழ்ச்சியாகும், இது பாறை நிலப்பரப்பு வழியாக அருவியாக ஓடும் நீரோடை போல் தோன்றும். கொல்லிமலையின் அடிவாரத்தில் அமைந்துள்ள புளியஞ்சோலை இயற்கை எழில் கொஞ்சும் ஒரு அடர்ந்த வனப்பகுதியாகும், இது மலையேற்றம் மற்றும் பிற சாகச நடவடிக்கைகளுக்கு மிகவும் பொருத்தமானது. நகர்ப்புறங்களின் சலசலப்புகளிலிருந்து வெகு தொலைவில் அமைந்துள்ள இந்த இடம், பிஸியான நகர வாழ்க்கையிலிருந்து முற்றிலும் தப்பிக்க உங்களுக்கு வாய்ப்பளிக்கிறது.

ட்ரெக்கிங் செய்ய சரியா ஸ்பாட்

அடர்ந்த தாவரங்களுக்கு மத்தியில் 12 கிமீ உட்புறத்தில் அமைந்துள்ள சிவன் கோயிலை வழிபடச் செல்லும் பக்தர்களும் இந்த அடிவாரத்தை இந்த கடந்து செல்கின்றனர். இந்த இடத்தை மலையேற்ற தளமாக மாற்றுவதற்கு நிறைய வாய்ப்புகள் உள்ளதாக அறிக்கைகள் தெரிவிக்கின்றன. புளியஞ்சோலையில் கிட்டத்தட்ட 24 ட்ரெக்கிங் ரூட்டுகள் உள்ளனவாம். எனவே சாகச விரும்பிகள் மற்றும் மலையேற்றம் செய்பவர்களுக்கு திருச்சிக்கு அருகாமையில் உள்ள இந்த சுற்றுலாத்தலம் மிகவும் பரிந்துரைக்கப்படுகிறது.

எப்போது செல்ல வேண்டும்

இயற்கை ஆர்வலர்கள், கேளிக்கை பிரியர்கள், புகைப்பட வெறியர்கள், அனுபவம் தேடுபவர்களுக்கு நல்ல இடம். இயற்கை நீரூற்றுகளில் குளித்து மகிழ ஆண்டு முழுவதும் சுற்றுலாப் பயணிகள் இங்கு வருகை தருகின்றனர். ஆனால் மழைக்காலங்களில் செப்டம்பர் - டிசம்பர் நீர்வரத்து அதிகம் இருப்பதால் அந்த நேரத்தில் மெயின் அருவிக்கு அருகாமையில் செல்லக்கூடாது.

நுழைவுக்கட்டணம்

இந்த இடத்தில் நீங்கள் தாராளமாக 2-6 மணி நேரத்தை அசாதாரணமாக செலவிடலாம். புளியஞ்சோலைக்கு நுழைவுக்கட்டணமாக ரூ.10 வசூலிக்கப்படுகிறது. நீர்வீழ்ச்சி எல்லா நாட்களிலும் எல்லா நேரத்திலும் திறந்திருக்கும், இருப்பினும் இருட்டுவதற்கு முன் நீங்கள் பார்வையிட அறிவுறுத்தப்படுகிறது. இப்பகுதியைச் சுற்றி மினி உணவுக் கடைகள் உள்ளன. அருவியில் ஆசை தீர குளித்துவிட்டு அவற்றையும் நீங்கள் ஒரு கை பார்க்கலாம்.

எப்படி செல்வது

திருச்சியிலிருந்து 40 நிமிட பயணமாக முதலில் துறையூரை அடைய வேண்டும். துறையூரில் இருந்து 25 கிமீ தொலைவில் அமைந்துள்ள புளியஞ்சோலையை அடைய வெறும் 20 நிமிடங்களே ஆகிறது. நீங்கள் கார் அல்லது பைக்கில் வருகிறீர்கள் என்றால் திருச்சியில் இருந்து கிளம்பி காவேரி பாலத்தைக் கடந்து மண்ணச்சநல்லூர், புலிவலம், ஆத்தூர் ரோடு வழியாக புளியஞ்சோலையை அடைந்திடலாம். இந்த அழகிய இடத்திற்கு நீங்கள் எப்போது செல்லப் போகிறீர்கள்?