இதுவே கொடைக்கானல் செல்ல சரியான நேரம் – சுற்றுலாப் பயணிகளை வரவேற்கும் பூத்து குலுங்கும் மலர்கள்!

எல்லா வருடங்களையும் போல இந்த வருட கோடையிலும் மலைகளின் இளவரசியான கொடைக்கானலின் அழகைக் காண சுற்றுலாப் பயணிகள் குவிந்துள்ளனர். காரணம் கோடை விடுமுறை மற்றும் வெயில் மட்டுமல்ல, இது தான் கொடைக்கானல் செல்ல சரியான சீசன்! அதுமட்டுமில்லாமல் கொடைக்கானலில் கோடை விழா கடந்த மே 26 தொடங்கி பிரமாண்டமாக களைகட்ட தொடங்கியுள்ளது. திருவிழாவின் ஒரு பகுதியாக பல்வேறு பகுதிகளில் இருந்து அதிகமான சுற்றுலாப் பயணிகளை ஈர்க்கும் வகையில் மலர் கண்காட்சியும் ஏற்பாடு செய்யப்பட்டுள்ளது. தென் மாநிலங்களில் கடந்த சில நாட்களாக வெப்பம் அதிகரித்து வருவதால் தமிழகம், கேரளா, கர்நாடகா ஆகிய மாநிலங்களில் இருந்து கொடைக்கானலுக்கு சுற்றுலாப் பயணிகளின் வருகை அதிகரித்துள்ளது! உங்களுக்கும் இந்த கோடை விழாவில் கலந்துக் கொண்டு கொடைக்கானலை சுற்றிப் பார்க்க ஆசையாக உள்ளதா? சூப்பரா பிளான் பண்ணிடலாம் வாங்க!

மலைகளின் இளவரசியான வசீகரமான கொடைக்கானல்

இந்தியாவிலேயே மிக அழகான மலைவாசஸ்தலங்களில் ஒன்றான கொடைக்கானல் தமிழ்நாட்டின் திண்டுக்கல் மாவட்டத்தில் அமைந்துள்ளது. 'காடுகளின் பரிசு' என்று மொழிபெயர்க்கும் ஒரு பெயருடன், இந்த இடத்தின் அமைதியும் அழகும் நம்மை மெய் சிலிர்க்க வைக்கிறது. மேற்குத் தொடர்ச்சி மலைகளில் அமைந்துள்ள இந்த அற்புதமான இடம் மூடுபனி காடுகள், மயக்கும் நிலப்பரப்புகள், அமைதியான ஏரிகள் மற்றும் இனிமையான வானிலை ஆகியவற்றால் சூழப்பட்டுள்ளது. இயற்கையாகவே, மலைவாசஸ்தலத்தின் இந்த அம்சங்கள் ஒவ்வொரு ஆண்டும் பல சுற்றுலாப் பயணிகளை ஈர்க்கின்றது என சொல்லலாம்.

இந்தியாவின் பல பகுதிகளிலிருந்தும் சுற்றுலாப் பயணிகளை ஈர்க்கும் கொடைக்கானல்

தமிழகம் மட்டுமின்றி, பல இந்திய மாநிலங்களில் இருந்து வரும் சுற்றுலா பயணிகளை மகிழ்விப்பதில் கொடைக்கானல் மும்முரமாக இருந்து வருகிறது. கோடை விடுமுறையை தங்கள் குழந்தைகளுடன் கழிக்க கொடைக்கானல் சரியான இடமாகும். மற்ற தென்னிந்திய மாநிலங்களுக்கு அருகாமையில் இருப்பதால், பெரும்பாலானவர்களுக்கு கோடைகாலத்தை கழிக்க இங்கு வருகை தருகின்றனர். கொடைக்கானல் ஆண்டு முழுவதும் இதமான காலநிலையைக் கொண்டிருப்பதால், எந்தப் பருவத்திலும் சிறந்த சுற்றுலாத் தலமாக விளங்குகிறது. பகலில் 20°C முதல் 28°C வரையிலும், இரவில் 10°C வரையிலும் வெப்பநிலை நிலவுகிறது.

கொடைக்கானலில் துவங்கிய வருடாந்திர கோடை விழா

ஒவ்வொரு ஆண்டும், இந்த மலைவாசஸ்தலம் தனது விருந்தினர்களை கோடை விழாவின் மூலம் வரவேற்கிறது மற்றும் இந்த அற்புதமான இடம் வழங்கும் அனைத்திலும் அவர்களை ஈடுபடுத்துகிறது. இந்த ஆண்டும் 60வது மலர் கண்காட்சி 3 நாட்கள் நடந்தது. வருடாந்திர கோடைகால கண்காட்சி ஜூன் 2 வரை நீடிக்கும். இந்த இடத்தின் இயற்கை வசீகரம் கொண்டாட்டங்களின் அதிர்வுடன் கலந்தால், நகரம் பெரும்பாலும் சுற்றுலாவில் அதிக எழுச்சியை அனுபவிக்கிறது. இந்த ஆண்டும் கொடைக்கானலில் சுற்றுலா பயணிகள் கூட்டம் நாளுக்கு நாள் அதிகரித்து வருகிறது.

நீங்களும் கொடைக்கானலுக்கு செல்ல விரும்புகிறீர்களா?

நீங்கள் உங்கள் குடும்பத்தினருடன் இந்த கோடையை கொடைக்கானலில் கொண்டாட விரும்புகிறீர்களா? அப்படியானால் இப்போதே வரவிருக்கும் நாட்களில் பஸ் அல்லது ரயில் டிக்கெட் புக் செய்து கொள்ளுங்கள். பேருந்து என்றால் தமிழக அரசு பேருந்துகளே கொடைக்கானலுக்கு இயக்கப்படுகின்றன, டிக்கெட் விலை ரூ. 535 தான். அல்லது, கோடை ரோடு வரை செல்லும் ரயில்களான Ms Tn Link Exp, Bkn Mdu Sf Exp, Mas Ncj Sf Exp, Pandiyan Exp, Chennai Egmore - Tiruchendur Exp போன்ற ரயில்களில் டிக்கெட் புக் செய்து, மலிவான ஹோம் ஸ்டேகளையும் இப்போதே முன்பதிவு செய்யுங்கள். திட்டமிட்டப்படி பயணத்தை தொடங்கி கொடைக்கானலில் அழகிய சுற்றுலாத் தலங்களை சுற்றிப் பார்த்திடுங்கள்!

கொடைக்கானலின் அழகிய சுற்றுலாத் தலங்கள்

1. கொடைக்கானல் ஏரி - 60 ஏக்கர் பரப்பளவில், நட்சத்திர வடிவிலான மனிதனால் உருவாக்கப்பட்ட ஏரியில் படகு சவாரி செய்து மகிழுங்கள். அது மட்டுமின்றி குதிரை சவாரி, சைக்கிள் ஓட்டுதல் மற்றும் மீன்பிடித்தல் ஆகியவற்றிலும் நீங்கள் ஈடுபடலாம்.

2. கெனோபி ஹில்ஸ் - கொடைக்கானலில் உள்ள அழகிய இடமாக சாகச ஆர்வலர்களுக்கு ஒரு ஹாட்ஸ்பாட்டாக இருக்கும் கெனோபி ஹில்ஸில் நீங்கள் ட்ரெக்கிங் செய்வது, கேம்பிங் செய்வது மிகவும் அலாதியாக இருக்கும்.

3. டால்பின் நோஸ் - டால்பினின் நோஸ் போன்ற வடிவிலான ஒரு தட்டையான, நீண்டுகொண்டிருக்கும் பாறையின் மீது நின்று கொடைக்கானல் முழு இயற்கை அழகையும் கண்டு ரசிக்கலாம்.

4. பியர் ஷோலா நீர்வீழ்ச்சி - கொடைக்கானல் ஏரியில் இருந்து 2 கிலோமீட்டர் தொலைவில் அமைந்துள்ள இந்த அழகிய நீர்வீழ்ச்சியில் நீங்கள் ஆனந்தமாக குளிக்கலாம்.

5. கோக்கர்ஸ் வாக் - மனிதனால் உருவாக்கப்பட்ட இந்த அழகிய நடைப்பயிற்சி பிளாசா சாயங்கால வேளையில் நடைபயணம் மேற்கொள்ளுங்கள்.

6. தலையார் நீர்வீழ்ச்சி - 297மீ உயரம் கொண்ட இது தமிழ்நாட்டின் மிக உயரமான அருவியாகும். டம் டம் பாறை வியூபாயின்ட்டில் இருந்து நீங்கள் அருவியின் அழகை ரசிக்கலாம்.

7. மன்னவனூர் - கொடைக்கானலில் இருந்து 35 கிமீ தொலைவில் அமைந்துள்ள இந்த அழகிய விவசாய கிராமத்தில் நீங்கள் பண்ணை விவசாயம், அழகிய விலங்கினங்கள், சமவெளிகள், ஏரிகள் ஆகியவற்றைக் காணலாம்.

8. பில்லர் ராக்ஸ் - 400 அடி உயரத்தில் இருக்கும் கற்பாறைகள், அதன் மேலே உள்ள மினி கார்டன் உங்களை மெய் சிலிர்க்க வைக்கும்.

9. டெவில்ஸ் கிச்சன் - பாறைகளுக்கு மத்தியில் அமைந்துள்ள குகைகள் மற்றும் மரங்களால் நிரம்பியிருக்கும் இந்த இடம் போட்டோ எடுப்பதற்கு ஏற்றது.

10. பிரையண்ட் பார்க் - கொடைக்கானலில் உள்ள மிகவும் பிரபலமான தாவரவியல் பூங்காக்களில் ஒன்றான பிரையண்ட் பூங்கா அதன் விலங்கினங்கள், ராஃப்ட்ஸ் மற்றும் கலப்பினங்களுக்கு பெயர் பெற்றது. இந்த இடம் குழந்தைகளுக்கு மிகவும் பிடிக்கும்.

11. சில்வர் கேஸ்கேட் நீர்வீழ்ச்சி - கொடைக்கானல் நகரத்திலிருந்து வெறும் 8 கிமீ தொலைவில் அமைந்துள்ள இந்த அழகிய நீர்வீழ்ச்சி அதன் வெள்ளி நீர் ஓட்டத்திற்கு பெயர் பெற்றது.

12. செண்பகனூர் மியூசியம் - கொடைக்கானல் ஏரியில் இருந்து 5.6 கிமீ தொலைவில் அமைந்துள்ள இந்த அருங்காட்சியகம் நாட்டின் சிறந்த ஆர்க்கிடோரியங்களில் ஒன்று மக்களே.

13. பைன் காடுகள் - கொடைக்கானலின் தென்மேற்கில் அமைந்துள்ள பைன் காடு, நகரின் மிகவும் பிரபலமான மற்றும் சுற்றுலாப் பயணிகளுக்கு மிகவும் பிடித்த சுற்றுலாத் தலமாகும்.

14. பாம்பார் நீர்வீழ்ச்சி - கிராண்ட் கேஸ்கேட் என்றும் அழைக்கப்படும் பாம்பார் நீர்வீழ்ச்சி மிகவும் அழகிய ஒரு சுற்றுலாத் தலம், கண்டிப்பாக மிஸ் பண்ணாமல் பார்க்க வேண்டிய இடமாகும்.

15. குணா குகை - 1991 இல் கமல்ஹாசன் நடித்த "குணா" திரைப்படம் மூலம் பிரபலமான இந்த குணா குகையை பார்க்காமல் கொடைக்கானல் விசிட் முழுமையடையாது.