என்ன சொல்றீங்க...தமிழகத்தில் இவ்வளவு பெரிய பாலைவனமா? எங்குள்ளது தெரியுமா?

இந்தியாவில் பாலைவனம் என்றாலே ராஜஸ்தான் மாநிலத்தில் மட்டும் தான் உள்ளது என பலரும் நினைத்துக் கொண்டிருக்கிறார்கள். ஆனால் தமிழகத்திலேயே பாலைவனம் உள்ளது. அதுவும் மூன்று மாவட்டங்களை உள்ளடக்கிய மிகப் பெரிய பாலைவனம் உள்ளது என்பது உங்களுக்கு தெரியுமா? தமிழகத்தில் பாலைவனம் உள்ளது என்பதை நம்ப முடியவில்லையா? உண்மை தான். இது சாதாரண பாலைவனம் இல்லை சிவப்பு மணல்கள் உள்ள சிவப்பு பாலைவனம். பலரும் அறியாத இந்த பாலைவனம் எங்குள்ளது? இதன் சிறப்புகள் என்ன? இதில் மறைந்திருக்கும் மர்மங்கள் என்ன என்பதை வாங்க தெரிந்து கொள்ளலாம்.

Photo Credit: Vaikundaraja S

தெரி காடு :

தமிழ்நாட்டின் இயற்கை அதிசயங்களில் மிகப்பெரிய மர்மம் மிக்கது தெரி காடு (Theri Kaadu). தூத்துக்குடி, திருநெல்வேலி மற்றும் கன்னியாகுமரி மாவட்டங்களின் ஒரு பகுதியாக உள்ள இது, தமிழகத்தின் "சிவப்பு பாலைவனம்" எனக் கருதப்படுகிறது. தென் தமிழகத்தில் உள்ள இந்த வித்தியாசமான நிலப்பரப்பைப் பற்றி அறிந்தால் ஆச்சரியப்படாமல் இருக்க முடியாது. கடலோரத்தில் மறைந்துள்ள இந்த பாலைவனம் சுமார் 12,000 ஏக்கர் நிலப்பரப்பில் அமைந்துள்ளது. பல நூறு ஆண்டுகளுக்கு முன் கடல் படிவங்கள், பலத்த கடல் புயல் ஆகியவற்றின் விளைவால் இந்த பாலைவனம் ஏற்பட்டிருக்கலாம் என சொல்லப்படுகிறது.

தெரி காடு மர்மம் :

தெரி காடு என்பது சாதாரண மணல் மேடு அல்ல. இது, இயற்கையின் நீண்ட கால மாற்றங்களால் உருவான, சுற்றுச்சூழலுக்கு அபாயம் விளைவிக்கும் மாறுபட்ட நிலப்பரப்பு. இதன் தனித்துவம், இதன் சிவப்பு மணல் மற்றும் மழை நீக்கத்தால் ஏற்படும் பெரிய பெரிய மணல் மேடுகள் அழகுடன் ஆபத்தும் நிறைந்தவைகள். தூத்துக்குடி, கன்னியாக்குமரி மாவட்டங்களுக்கு சென்று பீச்சை பார்வையிட நினைப்பவர்கள் கடற்கரையோரமாக இருக்கும் இந்த அதிசய பாலைவனத்தையும் பார்த்து ரசித்து விட்டு வரலாம். தெளிவான வானம், சிவப்பு நிற மணல் பரப்பு என வேற்று கிரகத்திற்கே சென்று வந்த ஒரு உணர்வை அளிக்கும்.

அருகில் உள்ள இடங்கள் :

தெரி காட்டிற்கு அருகிலேயே அருஞ்சுணை காத்த அய்யனார் கோவில் உள்ளது. இது இங்குள்ள புகழ்பெற்ற ஆன்மிகத் தலமாகும். புகைப்படங்கள் எடுத்து மகிழவும் இது ஏற்ற இடமாகும்.

தெரி காடு எங்கு அமைந்துள்ளது?

தூத்துக்குடி மாவட்டம் - ஆதிச்சநல்லூர், மேலமணலூர், கயத்தாறு
திருநெல்வேலி மாவட்டம் - பன்னைக்குடி, மணவாளக்குறிச்சி, திருக்குறுங்குடி
கன்னியாகுமரி மாவட்டம் - வட்டக்கோட்டை, அருகுப்பூர்

தெரி மணல் உருவான வரலாறு :

கடற்கரையின் மணல் உதிர்வு :

ஆயிரக்கணக்கான ஆண்டுகளுக்கு முன்பு, இந்த பகுதிகள் கடலுக்குள் இருந்திருக்கலாம் என்றும், காலப்போக்கில், கடலின் பின்னணியால் மணல் வெப்பத்தால் உலர்ந்து வறண்ட நிலமாக மாறியது என்றும் சொல்லப்படுகிறது.

இயற்கை அரிப்பு மற்றும் மணல் சரிவு :

வனங்கள் அழிக்கப்பட்டபோது, நிலத்திலிருந்த மணல் வெளிப்பட்டு காற்றால் தூக்கப்பட்டு, தட்பவெப்ப மாற்றங்களால் நிலைத்த நிலப்பரப்பாக மாறி இருக்கலாம் என்றும் சொல்லப்படுகிறது.

சிறப்பு கனிமங்கள் மற்றும் இரும்புச்சத்து :

இந்த மணலின் சிவப்பு நிறத்திற்குக் காரணம், ஹெமடைட் (Hematite) எனும் கனிமம். இது இரும்புச்சத்து நிறைந்த மணல். அதனால் இந்த மணல் சாதாரண மணலை விட வெப்பத்தை அதிகமாக உறிஞ்சிக் கொள்கிறது. தெரி காடு வெறும் மணல் பாலைவனம் மட்டும் அல்ல. இது பல தொல்பொருள் கண்டுபிடிப்புகளுக்குப் புகழ்பெற்ற இடம்.

ஆதிச்சநல்லூர் தொல்பொருள் சான்றுகள் :

ஆயிரக்கணக்கான ஆண்டுகளுக்கு முன்பு, இங்கு பழங்குடியின மக்கள் வாழ்ந்ததற்கான சான்றுகள், பழைய பானைகள், மெட்டல் ஆயுதங்கள், மனித எலும்புக்கூடுகள் போன்றவை கிடைத்துள்ளன. இது தொல்காப்பிய காலத்திலேயே நகர்ப்புறம் இருந்த இடமாக இருக்கலாம் என்பதற்கான சான்றுகள் கிடைத்துள்ளன. தமிழக வரலாற்றில் தொலைந்து போன நகரங்கள், இந்த மணலுக்குள் புதைந்து இருக்க வாய்ப்பு உள்ளது என்றும் சொல்லப்படுகிறது. தெரி காடு, சுற்றுலா பயணிகளை அதிகம் ஈர்க்கும் இடமாக சமீப காலமாக மாறி வருகிறது.

பயணிக்க சிறந்த காலம் :

செப்டம்பர் முதல் பிப்ரவரி வரை வறண்ட சூழல் காரணமாக கோடை வெப்பமானது அதிகமாக இருக்கும். மழைக்காலங்களில் சிறிய மழை தான் இருக்கும். ஆனால் மணல் எப்போதும் வெப்பமாகவே இருக்கும். ஜூன், ஜூலை மாதங்களில் இங்கு சென்று வரலாம்.

பயண வழிமுறைகள் :

- விமானம் மூலம் பயணிப்பவர்களுக்கு தூத்துக்குடி விமான நிலையம் அருகில் உள்ளது.
- ரயில் மூலம் பயணிக்க நினைப்பவர்களுக்கு திருநெல்வேலி மற்றும் தூத்துக்குடி வரை ரயிலில் பயணம் செய்து, அங்கிருந்து இருந்து பஸ்கள் மூலம் இந்த இடத்தை அடைய முடியும்.
- சாலைப் போக்குவரத்து வழியாக செல்ல நினைப்பவர்கள் தனியார் வாகனங்கள் மூலம் செல்லலாம்.

வறண்ட நிலத்தில் வாழும் மக்கள் :

இங்கு வாழும் மக்கள், இயற்கையுடன் போராடி வாழ்கிறார்கள். நிலம் உலர்ந்ததால், இங்கு விளைச்சல் குறைவாகவே இருக்கும். வாழை, கருவேப்பிலை, தென்னை, கள்ளி மூங்கில் போன்ற தாவரங்கள் வளர்க்கப்படுகின்றன. பொதுவாக மக்கள் விவசாயம் மற்றும் கூலி வேலை செய்வது வழக்கம்.
மழை குறைவாக இருந்தாலும், சில இடங்களில் நிலத்தடி நீர் மூலம் வாழ்வாதாரம் நடத்துகிறார்கள்.

தெரி காடு பாதுகாக்க வேண்டிய ஒரு இயற்கை பரிசு :

தெரி காடு அழிவின் விளிம்பில் உள்ளது. மணல் கொள்ளை மற்றும் சுற்றுச்சூழல் பாதிப்பு ஆகியவற்றால் இப்பகுதி அழியும் நிலையில் உள்ளது. இதன் மணல் விலை உயர்ந்ததால், மணல் அகழ்வும் கள்ளத் தொழில்களும் அதிகரித்துள்ளது. இயற்கை சமநிலைக்கு இது ஒரு பெரிய ஆபத்து. மழை இல்லாமை மற்றும் வன அழிப்பு, மழை குறைவதுடன், மரங்களை வெட்டுவதால், மணல் மேடுகள் நிலைமாறுகிறது. இது மண் சரிவுகளுக்கும் நிலச்சரிவுகளுக்கும் வழிவகுக்கும்.

மக்கள் விழிப்புணர்வு தேவை

அரசு மற்றும் சுற்றுச்சூழல் அமைப்புகள் இதை பாதுகாக்கும் முயற்சிகளை மேற்கொள்ள வேண்டும். மக்கள் இதன் முக்கியத்துவத்தை உணர்ந்து, மணல் கொள்ளையைக் கட்டுப்படுத்த பாடுபட வேண்டும். தெரி காடு என்பது வெறும் சிவப்பு மணல் பாலைவனம் மட்டுமல்ல. இது தமிழகத்தின் மறைந்திருக்கும் பொக்கிஷம். இதன் வரலாற்றுப் பின்னணியும், சுற்றுச்சூழலியல் முக்கியத்துவமும், இதனை தமிழகத்தின் ஒரு அரிய இயற்கை ஆச்சரியமாக மாற்றுகின்றன. இது வெறும் மணலா? ஒரு தொல்பொருள் பூமியா? இயற்கையின் விளையாட்டா? என்ற கேள்விகள் இன்னும் விடை காணப்படாமல் உள்ளன. ஆனால் நிச்சயமாக தெரி காடு, இந்தியாவின் மற்ற பகுதிகளுக்கு இல்லாத ஒரு தனிப்பட்ட இயற்கை நிலப்பரப்பாக திகழ்கிறது.

வாய்ப்பு கிடைத்தால் நீங்களும் ஒருமுறை இந்த சிவப்பு பாலைவனத்தை சென்று பார்த்து விட்டு வாருங்கள். இதுவரை நீங்கள் பாலைவனத்தை பார்த்தது கிடையாது என்றாலும் இது உங்களுக்கு நிச்சயம் ஒரு புதிய அனுபவத்தை தரும். வழக்கமான சுற்றுலா இடங்களுக்கே சென்று சளித்துப் போனவர்களுக்கு இது நிச்சயம் ஒரு சிறப்பான அனுபவத்தை தரும்.