Click it and Unblock the Notifications
வாக்கிங் செல்வதற்கும், உடற்பயிற்சி செய்வதற்கும், வயதான நண்பர்களுடன் அமர்ந்து கதை பேசவும், குழந்தைகளுக்கு விளையாட்டு காண்பிக்கவும் என பெரும்பாலானவர்களின் அன்றாட வாழ்வில் பூங்காக்கள் இன்றியமையாத இடம் பெற்றுவிட்டன. அது மாநகராட்சி பூங்காவாக, தாவரவியல் பூங்காவாக அல்லது நம் தெருவில் உள்ள சிறு பூங்காவாக கூட இருக்கலாம். இங்கு அது போல தான், முற்றிலும் இந்து மத வேதங்களை அடிப்படையாக கொண்டு இந்தியாவின் முதன்முதல் 'வேத பூங்கா' நொய்டாவில் திறக்கப்படவிருக்கிறது. வேதங்களால் ஈர்க்கப்பட்ட பூங்கா பார்வையாளர்களை வரலாற்றுப் பாதையில் பயணிக்க வைப்பதோடு அவர்களுக்கு இந்து மதத்தைப் பற்றிய ஒரு புரிதலையும் வழங்கும்! நொய்டாவைத் தொடர்ந்து இந்தியாவின் பல இடங்களிலும் வேத பூங்கா நிறுவப்படவிருக்கின்றன!
இந்தியாவின் முதல் வேத தீம் பார்க்
இந்தியாவின் முதல் வேத தீம் பார்க் நொய்டாவில் விரைவில் திறக்கப்படவிருக்கிறது. செக்டார் 78ல் உள்ள வேட் வான் பார்க் என்று பெயரிடப்பட்ட இந்த பசுமையான இடத்தில் வேத தீம் பார்க் முழு வீச்சில் தயார் செய்யப்பட்டு வருகிறது. ரூ. 27 கோடி மதிப்பிலான இந்த வேத பூங்கா இந்தியாவின் நான்கு வேதங்களான ரிக் வேதம், அதர்வ வேதம், சாம வேதம் மற்றும் யஜுர் வேதம் ஆகியவற்றை சிறப்பிக்கும் வகையில் அமைக்கப்பட்டுள்ளது. மேலும் இது இந்து மத நூல்களை கருப்பொருளாகக் கொண்ட முதல் பூங்கா என்று பாராட்டப்படுகிறது.
இரண்டு வருடங்களாக தொடரும் கட்டமைப்பு
மேற்கூறிய திட்டத்தின் பணிகள் ஜனவரி 2021 இல் தொடங்கப்பட்டன, அதேசமயம் இந்த திட்டத்துடன் தொடர்புடைய அதிகாரிகள், கட்டமைப்புகளை சிறந்த முறையில் வைத்திருக்க மண் சுருக்கம் மேற்கொள்ளப்பட்டதால் வேலை சற்று தாமதமானது என்று கூறினார். நொய்டா ஆணையத்தைச் சேர்ந்த வந்தனா ஸ்ரீவஸ்தவா கூறுகையில், இந்த நிலம் முன்பு குப்பை கிடங்காக இருந்ததாகவும், பூங்காவை உருவாக்குவதற்கு ஏற்ற வகையில் மண் அமுக்கப்பட்டதாகவும் கூறினார். இது தாவரங்களின் தரத்தை உயர்த்துவதற்காக செய்யப்பட்டது, மண்ணும் தளர்த்தப்பட்டது, பின்னர் மரங்கள் மீண்டும் நடப்பட்டன. விரைவில் பூங்கா பொதுமக்களின் பயன்பாட்டுக்கு திறக்கப்படும் என்று தெரிவித்தார்.
50,000 செடிகளுடன் அமைக்கப்படும் பூங்கா
இதுவரை, பூங்காவின் சுவரில் வேத காலத்தின் பகுதிகள் வரையப்பட்டுள்ளன, அதேசமயம் பார்வையாளர்களைக் கவரும் வகையில் வேதக் கருப்பொருளில் லேசர் ஷோவும் ஏற்பாடு செய்யப்படும். தென்னை, ஆலமரம், நெய் மற்றும் கல்பவிருட்சம் உள்ளிட்ட வேத இலக்கியங்களில் குறிப்பிடப்பட்டுள்ள 50,000 செடிகளும் நடப்படும்.
வேதங்களுக்கு முக்கியத்துவம்
அதுமட்டுமல்லாமல், வேத காலத்தின் புகழ்பெற்ற முனிவர்களான விஸ்வாமித்திரர், வசிஷ்டர், அகஸ்தியர், பரத்வாஜர், அத்ரி மற்றும் கௌதம் ஆகியோரின் பெயரால் வேதப் பூங்காவில் ஏழு மண்டலங்கள் இருக்கும். பிற புனித நூல்கள் மற்றும் அவற்றைப் பற்றிய தகவல்கள் பண்டைய இந்திய இலக்கியங்களுக்கு அவர்கள் செய்த பங்களிப்புகளைப் பற்றி குழந்தைகளுக்குத் தெரிவிக்கும். அழகான இயற்கை இடத்தில் சூரிய சக்தியில் இயங்கும் ஒரு அழகான ஆம்பிதியேட்டரும் உருவாக்கப்படும்.
அனைவரையும் கவரப்போகும் பூங்கா
எல்லா வயதினருக்கும் ஒரு பொழுதுபோக்கு இடமாகவும் குழந்தைகளுக்கு வேதங்களைப் பற்றிய விழிப்புணர்வு ஏற்படுத்தும் இடமாகவும் இந்த பூங்கா செயல்படும் என்று எதிர்பார்க்கப்படுகிறது. வேட் வான் பூங்கா 99 சதவீதம் நிறைவடைந்து ஜூன் மாதம் திறக்க திட்டமிடப்பட்டுள்ளது. இதை தொடர்ந்து இந்தியாவின் பல பகுதிகளிலும் வேத தீம் பார்க் விரைவில் திறக்கப்படும்.
