Click it and Unblock the Notifications
தமிழ்நாட்டின் கலாச்சார தலைநகரம், தூங்கா நகரம், மல்லிகை மாநகரம் மற்றும் கோயில் நகரம் என பல பெருமைகளை கொண்டுள்ள மதுரை மாநகரம் தமிழ்நாட்டின் முக்கிய மாநகரங்களில் முதன்மையானது. மதுரை மாநகரம் தமிழ்நாட்டின் பல பகுதிகளிலிருந்து பேருந்து, ரயில், விமான போக்குவரத்து மூலம் நன்கு இணைக்கப்பட்டுள்ளது. அதிலும் மதுரை விமான நிலையத்தின் சேவைகள் அதனை சுற்றியுள்ள பல மாவட்ட மக்களுக்கும் பெரிதும் வசதியாக இருந்து வருகிறது. இந்நிலையில் மதுரை விமான நிலையம் 3 இல் இருந்து 2 ஆம் நிலைக்கு தரம் உயர்த்தப்பட்டுள்ளது! அப்படியென்றால் என்ன தெரியுமா?
தென் மாவட்ட பயணிகளுக்கு பலனளிக்கும் விமான நிலையம்
மதுரை விமான நிலையம் 1957 இல் நிறுவப்பட்டது. 60 ஆண்டுகளுக்கும் மேலாக சேவையில் இருக்கும் இந்த விமான நிலையம் இரண்டு அடுத்தடுத்த முனையங்களைக் கொண்டுள்ளது. உண்மையில், இது தமிழ்நாடு மாநிலத்தில் உள்ள மதுரை மற்றும் தென் மாவட்டங்களுக்குச் சேவை செய்யும் முக்கிய விமான நிலையமாகும். மதுரை விமான நிலையம் மதுரை ரயில்வே ஜங்ஷனில் இருந்து வெறும் 12 கி.மீ தூரத்தில் தான் அமைந்துள்ளது.
விமான நிலைய வளாகத்தை மறுவடிவமைத்து மேம்படுத்த திட்டம்
விமான நிலையத்தில் பயணிகளின் வருகை வேகமாக அதிகரித்து வருகிறது, இது விமான நிலையத்தின் வளர்ச்சி மற்றும் மறு மாற்றத்திற்கு அழைப்பு விடுத்துள்ளது. அதனால் AAI 17,600 சதுர மீட்டர் பரப்பளவில் பரந்து விரிந்துள்ள இந்த விமான நிலையத்தில் புதிய ஒருங்கிணைந்த முனையக் கட்டிடத்தையும் சமீபத்தில் திறந்து வைத்தது. அதோடு மட்டுமல்லாமல் இந்திய விமான நிலைய ஆணையம் விமான நிலைய வளாகத்தை மறுவடிவமைத்து மேம்படுத்த திட்டமிட்டுள்ளது. கட்டுமானத் திட்டம் புறப்படும் நுழைவு வாயில்கள், விமான நிலைய ஊழியர்களுக்கு அர்ப்பணிக்கப்பட்ட நுழைவு வாயில்கள், விஐபி செக்-இன் சந்திப்புகள் 28 ஆக அதிகரிக்கப்பட வேண்டும் மற்றும் வளாகத்தின் சில மறுசீரமைப்புகள் வரை நீட்டிக்கப்பட்டுள்ளது.
மதுரையில் அதிகரித்து வரும் பயணிகளின் எண்ணிக்கை
மதுரை விமான நிலையத்தில் இருந்து சென்னை, பெங்களுரூ, ஹைதராபாத், டெல்லி, மும்பை உள்ளிட்ட உள்நாடுகளுக்கும், துபாய், இலங்கை, சிங்கப்பூர் போன்ற வெளிநாடுகளுக்கும் விமானங்கள் இயக்கப்படுகின்றன. இரவு நேர விமான சேவையும் தொடங்கியதால் மதுரை விமான நிலையத்தை பயன்படுத்தும் பயணிகளின் எண்ணிக்கை தொடர்ந்து நாளுக்கு நாள் அதிகரித்துள்ளது.
தரம் உயர்ந்த மதுரை விமான நிலையம்
இந்நிலையில், மதுரை உள்ளிட்ட 6 விமான நிலையங்கள் தரம் உயர்த்தப்பட்டுள்ளதாக மத்திய சிவில் விமான போக்குவரத்து துறை அமைச்சகம் அறிவித்துள்ளது. இதில் மதுரை, அகர்தலா, போபால், சூரத், உதைப்பூர், விஜயவாடா ஆகிய விமான நிலையங்கள் மூன்றாம் நிலை தரத்தில் இருந்து 2 ஆம் தர நிலைக்கு உயர்ந்துள்ளது. அகில இந்திய அளவில் விமான நிலையங்களில் அதிகரித்துள்ள விமான சேவை, விமான பயணிகளின் வருகை ஆய்வு அடிப்படையிலேயே மதுரை உள்பட 6 விமான நிலையங்கள் தரம் உயர்த்தப்பட்டுள்ளது என அதிகாரிகள் தெரிவித்தனர்.
