கருங்கல் தூண்களில் இருந்து வரும் இசை – அதிசயங்கள் நிறைந்த நெல்லையப்பர் கோவில்!

சேர, சோழ, பல்லவ, பாண்டியர்கள் துவங்கி, சாளுக்கிய, ஹொய்சாள, திராவிட கட்டிடக்கலை பாணியில் எண்ணற்ற கோவில்கள் தமிழகத்தை அலங்கரிக்கின்றன. ஆயிரம் ஆண்டுகளாக கம்பீரமாக நிற்கும் தஞ்சை பெரிய கோவில், உலக அதிசயங்களுக்கே சவால் விடும் மதுரை மீனாட்சி கோவில் வரிசையில், கருங்கல் தூண்களில் இருந்து இசையை உணர முடிகின்ற அதிசயம் நிகழும் திருநெல்வேலி நெல்லையப்பர் கோவிலைப் பற்றி இன்று நாம் தெரிந்துக் கொள்ளலாம்! நெல்லையப்பர் கோவிலில் உள்ள இசைத் தூண்கள், உலகில் வேறு எங்கும் காண முடியாத அதிசயங்களில் ஒன்றாகும்!

7 ஆம் நூற்றாண்டில் எழுப்பப்பட்ட கோவில்

கோயிலின் காலத்தை இலக்கிய மற்றும் கல்வெட்டு சான்றுகள் மற்றும் கோயிலின் கட்டிடக்கலை பாணியில் இருந்து அறியலாம். நெல்லையப்பர் கோயில் தோன்றிய தேதியை நிர்ணயிப்பது எளிதல்ல. இது கி.பி 7 ஆம் நூற்றாண்டில் இருந்தது என்பதும், காலப்போக்கில் அது படிப்படியாக ஒரு பெரிய வளாகமாக வளர்ந்தது என்பதும் தெளிவாகிறது.

இந்தியாவிலேயே மிகப்பெரிய சிவாலயங்களில் ஒன்று

756 அடி நீளமும், 378 அடி அகலமும் கொண்ட இக்கோவில் ஆசியாவிலேயே மிகப் பெரிய சிவாலயமாக விளங்குகிறது. முதலில் அம்பாளுக்கும், சிவனுக்கும் தனித்தனியாக கோவில்கள் அமைக்கப்பட்டு, பிறகு இரண்டிற்கும் இடையே பெரிய கல் மண்டபம் அமைத்து ஒன்றாக இணைக்கப்பட்டதாக சொல்லப்படுகிறது. இக்கோவில் பாண்டிய மன்னர்களால் கட்டப்பட்டு, பிறகு சோழர், பல்லவர் போன்ற மன்னர்களால் சீரமைக்கப்பட்டு, விரிவாக்கம் செய்யப்பட்டதாகவும் சொல்லப்படுகிறது.

கேட்டது கொடுக்கும் நெல்லையப்பர் காந்திமதி தாயார்

நெல்லையப்பர் கோவிலில் சிவபெருமான் காந்திமதி தாயாருடன் நெல்லையப்பராக பக்தர்களுக்கு அருள் பாலிக்கிறார். இந்த கோவில் இரு மூலவர் கொண்ட தனித்தன்மை வாய்ந்த கோவிலாகும். தனி சன்னதி கொண்டு பக்தர்களின் குறை தீர்க்கும் காந்திமதி தாயார் செல்வம், குழந்தைபேறு, உடல்நலம், வேலை கேட்டு மனமுருகி வேண்டினால் வேண்டியவற்றை தந்து பக்தர்களை மகிழ்விப்பார் என்பது நம்பிக்கை. இங்கே முருகன், பிள்ளையார் உள்ளிட்ட கடவுள்களுக்கும் தனி சன்னதி உண்டு.

Photo Credit: Theni.M.Subramani

நுணுக்கமான கட்டிடக்கலையை பிரதிபலிக்கும் சுற்றுப்புறம்

கர்பக்ரஹம், அர்த்தமண்டபம், மகாமண்டபம் மற்றும் மணிமண்டபம் ஆகியவற்றைக் கொண்ட முக்கிய சன்னதி இதுவாகும். கருவறையைச் சுற்றி தெற்கு, மேற்கு மற்றும் கிழக்குப் பிரகாரங்களில் பாதமண்டபம் மற்றும் தூண்களுடன் கூடிய ஒன்பது தூண்கள் பாண்டியர் காலத்தைச் சேர்ந்தவை. பாதமண்டபத்தின் மீது வட்டமான தூண்கள் உள்ளன மற்றும் முத்துச் சிப்பியைப் போல வெட்டப்பட்ட பொதிகை தளங்கள் உள்ளன.

முற்கால சோழர்கள் காலத்தில் வைக்கப்பட்ட தூண்கள்

முதலாம் குலோத்துங்க மற்றும் முதலாம் ராஜேந்திர ஆகியோரின் கல்வெட்டுகளுடன் கூடிய தூண்களை நீங்கள் இங்கே காணலாம். இந்த தூண்கள் இடைக்கால பாண்டியர்களுக்கு முன்பே கட்டப்பட்டவை என்பதற்கு சான்று பகர்கின்றன. எனவே இந்த தூண்கள் முற்கால சோழர்கள் காலத்தில் இருந்ததாக நம்பப்படுகிறது. இந்த முதல் பிராகாரத்தின் சுவர்களில் முதலாம் மாறவர்மா சுந்தர பாண்டிய மற்றும் இரண்டாம் சுந்தர பாண்டியன் ஆகியோரின் கல்வெட்டுகள் உள்ளன.

பல்லவ கட்டிடக்கலை வேலைப்பாடுகளும் உண்டு

பல்லவர் கோயிலைப் போன்று விமானமும், அர்த்தமண்டபமும் கொண்ட சிறிய சன்னதியில் தெய்வம் இருப்பது கோயிலின் தொன்மையைக் காட்டுகிறது. தூண்கள் மற்றும் சுவர்கள் பாதி புதைந்த நிலையில் கோவில் சுவர்களில் "வட்டெழுத்து" கல்வெட்டுகள் உள்ளன.

பல்லவர் காலம் வரை கோயில்களில் கருவறை மற்றும் "அர்த்தமண்டபம்" மட்டுமே இருந்தன. கோயிலைச் சுற்றி மண்டபங்கள் எதுவும் கட்டப்படவில்லை. எனவே இது 7 ஆம் நூற்றாண்டில் இருந்த பாண்டியர் கோவிலுக்கு சிறந்த எடுத்துக்காட்டாக விளங்குகிறது.

Photo Credit: Ssriram MT

சப்தஸ்வரங்களை எழுப்பும் இசைத்தூண்கள்

இரண்டாம் பிரகாரத்தில் ஏழிசை ஸ்வரங்களை எழுப்பும் இசை தூண்கள் உள்ளன. இந்த தூண்களை வெறும் கைகளால் தட்டினாலே ச,ரி,க,ம,ப,த,நி என்ற ஏழு ஸ்வரங்களும் ஒலிக்கும். ஒவ்வொரு தூணும் ஒவ்வொரு இசையை எழுப்பக் கூடியவையாகும். பெரிய தூணில் கர்நாடக சங்கீதமும், அதை சுற்றி உள்ள சிறிய தூண்களில் மிருதங்கம், கடம், சலங்கை, வீணை, மணி போன்ற இசைக்கருவிகளில் இசையை ஒலிக்கின்றன.

திருவிழாக்களின் போது இசைத்தூண்களில் இருந்து இசை

இது போன்ற இசை தூண்கள் உலகில் வேறு எங்கும் கிடையாது. எந்த தொழில்நுட்ப வசதியும் இல்லாத காலத்தில் ஒவ்வொரு தூணும் ஒவ்வொரு விதமான அலைக்கற்றையை உருவாக்கும் விதத்தில் எப்படி உருவாக்கினார்கள் என்பது இன்று வரை வியப்பை மட்டுமே தருகிறது. ஒவ்வொரு கல்லையும் ஒவ்வொரு பதத்தில் இழைத்திருந்தால் மட்டுமே இது சாத்தியமாகும். அந்த காலத்தில் திருவிழாக்களின் போது இசைக்கலைஞர்கள் இந்த தூண்களை பயன்படுத்தியே இசைத்ததாக சொல்லப்படுகிறது.